Утре ќе започне четвртото издание на Втората женска фудбалска лига со натпреварите од првото коло.
Во новата сезона како што веќе објави Спортска Мрежа екипата на Кочани е главен фаворит за освојување на првото место кое директно води во Прва лига, а пак дебитант е екипата на Слободен.
Дебитантот Слободен сезоната ја започнува против Порече од Македонски Брод, натпревар на кој Слободен ќе атакува на победа и на освојување на првите дебитански бодови. Марио Стојчевски ќе биде задолжен за правдата на овој меч.
Вицешампионот Вардар кој не го помина баражот за влез во Прва лига, новата сезона ја започнува на домашен терен против радовишка Плачковица. Вардар и во новата сезона најавува атак на местата за Прва лига, но гостинот од Радовиш со неколку засилувања во Скопје доаѓа по изненадување.
Анастасија Брајковска ќе ја дели правдата, а нејзини помошници ќе бидат Цветанка Саеска и Теодора Крстевска.
Билјанини Извори на домашен терен ќе се соочи со фаворитот Кочани во меч каде трите бодови се единствена цел и опција за гостинот. Целта на Кочани во новата сезона ќе биде враќање во Првата лига.
Филип Стојановски од Битола ќе биде задолжен за правдата на мечот во Охрид, а негови помошници ќе бидат НИкола Маркоски и Бобан Цветаноски.
Колото ќе се комплетира в среда со мечот меѓу Победа Валандово 16 и Борец од Велес, во натпревар каде и двете екипи посакуваат позитивен старт на новата сеона. Виолета Јанчева од Гевгелија ќе ја дели правдата на овој меч.
