Вчера беа одиграни два натпревари од 13. коло на Трета лига – Запад, кое коло треба да се докомплетира откако истото требаше да биде одиграно во последниот викенд од месец ноември минатата година, но поради снегот беше одигран само еден меч кога Тетекс со 1:0 славеше против Речица.
Влазерими одлично ја започна 2025 година откако со 0:3 на гостински терен го совлада тимот на Зајази, а сите три погодоци беа постигнати во вториот дел.
Мурат Адили во 53. минута постигна гол за отварање на резултатот и водство на Влазерими од 0:1. Потоа со два брзи гола во 65. минута Насаф Шабанов и Сутки Муслија ги поставија конечните 0:3.
Дрита на домашен терен во Боговиње со 2:1 славеше против Ренова. Ви првиот дел Хузри Џемаили постигна гол за 1:0 на полувреме. Во вториот дел Брендим Рушити погоди за 2:0 во 77. минута, а шест минути подоцна Гетоар Хазири ги постави конечните 2:1.
Денес екипата на Џепчишти на домашен терен ќе игра со Камјани, Доброшти против Љуботен, а пак Вардар во Брвеница го чека Напредок.
