Вардар преку пресврт триумфираше против Охрид во „Билјанини Извори“, каде фаворитот се намачи да ги обезбеди двата бодови, во меч каде Охрид беше одличен и беше блиску до победа.
Ракометарот на Вардар, Милан Лазаревски во изјава за Спортска Мрежа рече дека не му е проблем да признае дека домашните ракометари на момети играле и подобро, но сепак како што вели репрезентативецот нивното искуство било пресудно.
„Честитки на двата тима, Охрид покажа дека навистина знае да игра, игра на високо ниво- се одразуваат инвестициите во овој клуб од страна на локалната самоуправа и навистина секоја пофалба за проектот којшто го градат. Во некои сегменти можеби денес беа подобри од нас, јас мислам дека нашето искуство на крај беше пресудно, иако на моменти можеби домашните ракометари играа и поквалитетно, не ми е проблем да го признаам тоа. Сепак, на крај мислам дека нашето искуство и нашата, па да кажам поголема жар, во клучните моменти беа решавачки за исходот на овој натпревар“, изјави Лазаревски за Спортска Мрежа.
Искусниот Лазаревски за Спортска Мрежа, исто така изјави дека на никого нема да му биде лесно во „Билјанини Извори“ кога се во прашање натпреварите од плеј-офот, каде ќе се разигрува за титулата.
„Како што знаевме и ние пред овој двомеч, Охрид е сериозен противник особено во плеј-офот, така да мое скромно размислување е дека на никого нема да му е лесно во „Билјанини Извори“ што се однесува на плеј-офот“, додава Лазаревски.
Охрид на полувреме имаше предност од 16:11, а мечот го загуби со 26:27.
