Ракометарите на Охрид загубија на „генералката“ со поранешниот двократен европски првак Вардар со резултат од 29:33, во пријателски меч кој се играше во „Билјанини Извори“.
Овој меч беше последен тест и за двете екипи да ја проверат формата пред стартот на вториот дел од сезоната кој е закажан веќе за овој викенд.
„Вардарци“ на полувреме имаа плус пет предност во однос на охриѓани односно 10:15.
Охрид пролетниот дел го отвара во Велес како голем фаворит против дебитантот Бисинов, додека пак Вардар ќе гостува како фаворит кај Пролет.
- ПОГЛЕДНЕТЕ ДЕЛ ОД АТМОСФЕРАТА НА НАТПРЕВАРОТ ОХРИД – ВАРДАР:
Од регуларниот дел остануваат уште шест кола, по што ќе се формира плеј-оф и плеј-аут сегментот. Охрид и Вардар, заедно со Алкалоид и Еурофарм Пелистер се сигурни патници во плеј-офот, додека пак за пополнување на последните две места се борат Бутел, Тиквеш, Прилеп и Пролет, две од овие екипи ќе извисат и ќе бидат дел од плеј-аутот каде што ќе бидат Куманово, Бисинов, Струга и Радовиш.
