Второлигашот Каменица Саса за пролетната полусезона промовираше три засилувања со кои тимот ќе ја засилува конкуренцијата во своите редови.
Се работи за младиот голман Лазе Гицев, кој доаѓа од редовите на Осогово, 19-годишникот е повратник во Саса, а има настапивано и за Слога Виница.
Давид Голубов ќе ја засили офанзивата на десната крилна позиција, се работи за 18-годишен играч кој доаѓа од екипата на Охрид, а има настапувано и за екипата на Илинден.
18-годишниот Стефан Коловски е офанзивец шпиц играч, а во Саса доаѓа исто така од редовите на Охрид. Коловски има настапувано за младинските категории на Работнички.
„ФК Каменица Саса покрај новите засилувања, кои се надеваме дека ќе внесат нова енергија и свежина во играта, продолжува со интензивните подготовки во зимскиот преоден период контролните натпревари со повеќе екипи. Веќе во среда се среќаваме со екипата на Башкими во Куманово. Претходно, одигравме пријателски натпревари со екипите на Осогово во Кочани и со Слога во Виница“, велат од клубот од Македонска Каменица.
Саса вториот дел од сезоната го отвара против Кожуф, но наместо на домашен терен ќе треба да игра на друг терен, поради суспензијата на теренот во Македонска Каменица.
