Како што дознаваме ланскиот второлигаш Тетекс, кој е есенски шампион во Трета лига – Запад ќе се засили со младиот Даут Даути, кој доаѓа од редовите на второлигашот Осогово од Кочани.
19-годишникот настапуваше и за Тиквеш, а потекнува од тетовска Шкендија и се очекува да биде одлично засилување, но и освежување во редовите на Тетекс пред пролетните предизвици. Целта на „штофарите“ од Тетово е враќање во Втората лига, а за таа цел поранешниот прволигаш започнува со засилувања на тимот.
Екипата на Тетекс има четири бодови повеќе во однос на второпласираниот Влазерими, тим кој две години по ред е шампион, но не го поминува баражот, но пак актуелниот шампион има и меч помалку во однос на Тетекс, а тоа ветува супер интересна пролетна полусезона во Трета лига – Запад.
Уште поинтересно е тоа што пролетната полусезона ќе биде отворено со супер-дербито меѓу двата директни конкуренти, односно соочување на Тетекс и Влазерими, па тој меч може да биде и клучен околу патникот во баражот за Втора лига.
