Прволигашот СЦ Истатов ги “запали моторите” во зимски услови. Клубот кој го предводи искусниот стратег Кирил Изов вчера ја имаше првата прозивка за означување на старт на зимските подготовките за вториот дел од Првата женска фудбалска лига и предизвиците во Купот.
Во снежното скопско “Пржино” беше одработен првиот тренинг на снег.
“Мотивирани, расположени и насмеани нашите девојки ги истрчаа првите километри на теренот во Пржино кој е покриен со снег, но истиот не претставуваше пречка во реализација на планираните активности”, велат од клубот.
Првата фаза ќе се одработи во Скопје, а потоа тимот ќе замине на подготовки во Дојран, каде ќе се темпира формата во СЦ “Истатов” каде има перфектни услови, а каде доаѓаат екипи од Македонија и странство на подготовки.
“Закажани се пријателски натпревари со шампионот Љуботен на 1. февруари, на 15. февруари играме со соседот ЖФК Скопје, на 22. февруари ќе гостуваме во Речица, додека викендот 08/09. февруари е резервиран за гостување во Србија и двомеч со Машинац во Ниш. Планираме да го засилиме дополнително и тимот, веќе ни пристапи Андреа Коловска од ЖФК Љуботен, во преговори сме со уште неколку млади фудбалерки, но според мене најголеми засилувања за тимот ќе биде враќањето од повреди на стоперот Катерина Петкова и најдобриот стрелец Кристина Петрушевска кои се фит и од 15. јануари ќе се приклучат на тимот и на подготовките“, изјави стратегот Кирил Изов за Спортска Мрежа.
СЦ Истатов пролетниот дел го отвара на домашен терен против лидерот Тиверија Брера од Струмица.
