Есенскиот шампион во Првата македонска фудбалска лига, екипата на Силекс, денес ги започна подготовките за пролетните предизивци, каде тимот на Александар Васоски ќе атакува на освојување на титулата после долгата пауза.
Денес, во Кратово беше одржан првиот тренинг со што започнува борбата во походот по титулата во фудбалската елита на Македонија.
Силекс е на врвот од табелата со 37 бодови, колку што имаат Шкендија и Работнички, па затоа во пролениот дел ќе гледаме повеќе од неизвесна и пеколна борба за освојување на титулата.
Прволигашот од Кратово имаше одлична есен зад себе, прикажа допадлив фудбал, имаше и најмногу победи вкупно 11, четири ремимја и три порази, а ја има и најдобрата одбрана заедно со Работнички, со по осум примени погодоци.
Првата фаза од подготовките ќе се одработи во Кратово, а на 22. јануари тимот ќе „летне“ за Анталија, Турција, каде ќе остане до 5. февруари и каде ќе одигра пет пријателски.
Првата контролка на турско тло ќе биде против Нефтчи Фергана, закажана за 24. јануари, четири дена подоцна тестирање со Пахтакор, на 31. јануари против Ружомберок.
На 3. февруари тестирање со Аск Боитсберт, а пак на 4. февруари Силекс ќе одигра контролен натпревар против Железничар.
Силекс пролетниот дел од Првата фудбалска лига го отвара на домашен терен, ќе го пречека актуелниот освојувач на Купот, Тиквеш од Кавадарци. Пролетната полусезона ќе биде отворена со натпреварте од 19. коло на 16. февруари.
