Кожуф ќе ја започне пролетната полусезона од Втората лига со нов тренер, откако клубот и досегашниот стратег Филип Деспотовски одлучија да ги разделат своите патишта.
Во моментов, раководството на клубот е активно во потрага по нов тренер, а преговорите со потенцијални кандидати се веќе во тек. Се очекува во наредниот период да биде официјално претставен новиот стратег кој ќе ја предводи екипата во борбата за подобар пласман.
Кожуф ја заврши есенската полусезона на делба на осмото место на табелата, израмнет со Скопје, при што двата тима освоија по 22 бодови.
Освен тренерската промена, се најавуваат и значајни промени во управата на клубот. Нови лица ќе ја преземат одговорноста за организацијата и стратегијата на клубот, а новиот тренер најверојатно ќе има можност да направи корекции во играчкиот кадар пред продолжувањето на сезоната.
Пролетниот дел Кожуф ќе го започне со гостување во Македонска Каменица против екипата на Саса, закажано за 15 февруари.
