Шампионот Струга Трим Лум на 8. јануари ќе ги започне подготовките за пролетниот дел од Прва лига, каде стружани ќе атакуваат на одбрана на титулата.
Првата фаза ќе се одработи во Струга и ќе трае десет дена, по што шампионот на 18. јануари ќе замине за Анталија, Турција, каде ќе ја одработи главната фаза од подготовките.
Во Турција екипата на Струга останува до 1. февруари, додека покрај физичката и техничко-тактичката подготовка, тимот ќе одигра и неколку пријателски натпревари.
Првиот пријателски натпревар на турско тло Струга го игра на 20. јануари кога за противник ќе ја има добро познатата унгарска екипа на Дебрецин.
Корона Киелце од Полска ќе биде вториот противник на 24. јануари, додека само ден подоцна стружани ќе се соочат со Рубин Казањ од Русија.
Четврти противник на Струга во Анталија ќе биде екипата на Кизилхар од Казахстан, додека на последниот дел од јануари, Струга ќе се тестира со Михаловце од Словачка.
Струга на 1. февруари ќе се враќа во Македонија, каде ќе одигра уште неколку пријателски натпревари пред стартот на пролетниот дел од ПМФЛ кој е закажан за 16. февруари. Пролетниот дел шампионот го стартува со дерби дуел против Гостивар.
