Вардар ја продолжи победничката серија во Суперлигата, откако во петтото коло убедливо го совлада Охрид со 27-18 во „Јане Сандански“.
„Црвено-црните“ уште во првиот дел покажаа дека нема да дозволат неизвесност. Охрид успеваше да парира само во воведните минути, а потоа нападот на гостите влезе во долг пост без реализација. Вардар ја искористи ситуацијата, ја затегна одбраната и направи серија со која се одлепи на убедливи 8-3.
До полувремето домашниот состав целосно го презеде натпреварот и на пауза замина со 14-6.
Во продолжението Вардар продолжи во ист ритам и во 40. минута стигна до двоцифрена предност – 20-10. Неколку минути подоцна разликата достигна и максимални 13 гола, при резултат 26-13.
Охрид во финишот успеа да намали дел од негативата, но победникот одамна беше решен. Вардар рутински го приведе мечот до крај и славеше со 27-18.
Кај шампионот најефикасни беа Фадуил, Абделах и Љевар со по пет гола, додека кај Охрид Јошида постигна четири погодоци.
