Младост в сабота ќе игра важен меч во рамките на 5. коло во Автокоманда, дуел против Мулти Есенс, каде тимот од Богданци ќе ја бара првата сезонска радост.
Натпреварите кои беа од „четворката“ со Вардар и Алкалоид следуваат три натпревари на кои тимот од Богданци ќе мора да ги добие и да ги освои двата бодови.
Искусниот Владимир Бојаниќ, кој летово го засили Младост, за Спортска Мрежа го најави мечот во Автокоманда. Бојаниќ кој летово дојде од редовите на Охрид, најпрво зборуваше за четири натпревари кои поминаа – за ремито со Бутел во Скопје, несреќниот пораз дома со Прилеп и двата тешки мечеви со Вардар и Алкалоид.
„Па, искрено, имавме малку тежок распоред. Тој бод против Бутел многу ни значи, се случи и несреќниот пораз, а потоа имавме две тешки натпревари против екипи од големата четворка. Но, мислам дека поразот од Прилеп е една поука која ја извлековме. Од овие четири натпревари научивме многу и секогаш можеме подобро, така што треба само да продолжиме да работиме“, изјави Бојаниќ за Спортска Мрежа.
Мечот во Автокоманда е исклучително важен, не само за Младост, туку и за Мулти Есенс во борбата за опстанок.
„Натпреварот со Мулти Есенс е многу важен, како за нас така и за нив, во борбата за опстанок и освојување на важни бодови. Во овие три натпревари може многу работи да се решат. Ако одиграме паметно и го дадеме максимумот, можеме да направиме добар резултат“, дополни Бојаниќ.
Србинот има само пофални зборови за публиката во Богданци, дополнувајќи дека за едно мало место кое има богата ракометна историја, вели дека сите заедно треба да направат добри резултати.
„За публиката во Богданци – „симнувам капа“. На овие три натпревари навистина имавме голема поддршка и се гледа дека Богданци е подготвен за големи натпревари. Моја желба е Богданци секогаш да игра во најсилна конкуренција, бидејќи ваквите места, со ваква публика на секој натпревар, заслужуваат многу. За едно мало место кое има богата ракометна историја, сите заедно треба да направиме добри резултати“, заклучи Бојаниќ.
Натпреварот меѓу Мулти Есенс и Младост се игра во сабота од 16 часот во Автокоманда.
