Охрид и Еурофарм Пелистер одиграа возбудливо дерби на стартот од новата сезона, кое пред полните трибини во „Билјанини Извори“ заврши без победник, 28-28. Доминик Мате беше прво име кај „гладијаторите“ со дури 11 постигнати голови, а токму неговиот погодок во финишот донесе водство од 28-27. Сепак, Пелистер во последната секунда преку Петар Атанасијевиќ успеа да израмни и да освои бод.
Мате одигра одличен натпревар и беше најпрецизниот ракометар на целиот меч. Иако Охрид беше на чекор до победа, гостите успеаја да го искористат последниот напад и да стигнат до реми.
По натпреварот, во изјава за Спортска Мрежа, Мате истакна дека тимот може да биде горд на прикажаното, особено по поразот од Вардар во Супер купот. Тој ја потенцираше борбеноста на Охрид до самиот крај, но и неверојатната атмосфера на трибините.
„Пред сè, честитки за Пелистер бидејќи ни ,,украдоа” бод. Но, ние треба да бидеме горди на себе бидејќи завршивме одлична работа по поразот од Вардар во Супер купот. Така што, секако сакавме да победиме, но…еден бод е исто така добро, не сме поразени. Тоа е голема работа против екипа како Пелистер, така што треба да бидеме горди на себе. Се боревме до крај. Затоа сме навистина среќни и им благодарам на навивачите, беше неверојатно добро да се игра во ваква атмосфера, па ајде вака и да продолжиме понатаму.“- изјави Мате за Спортска Мрежа.
Охрид ја отвори сезоната со бод во големото дерби, а Мате со своите 11 гола покажа дека ќе биде една од главните офанзивни алки на тимот. „Гладијаторите“ сега ќе го насочат вниманието кон следните предизвици во сезоната.
