Охрид и Еурофарм Пелистер одиграа вистинско дерби пред полните трибини во СЦ „Билјанини Извори“, а по 60 минути голема борба резултатот беше 28-28. Битолчани беа пред пораз, но Петар Атанасијевиќ во последната секунда погоди за реми и голем бод од тешкото гостување. Капитенот на Пелистер, Филип Кузмановски, беше најпрецизен во својот тим со 10 погодоци.
Кузмановски по натпреварот, во изјава за Спортска Мрежа, го пофали својот тим за прикажаното во тешкиот дуел, но посебно ги истакна навивачите кои направија атмосфера во која гостинскиот состав се чувствувал како да игра на домашен терен. Тој потенцираше дека сезоната допрва започнува, а со оглед на големиот број нови играчи, на тимот му претстои период на адаптација и напорна работа.
„Горд сум на моите момци, навистина. Денес беше тешко да се игра. Морам да ги пофалам уште еднаш навивачите кои навистина ја направија таа атмосфера тука и се чувствувавме како да играме дома. Среќни сме со бодот и одиме понатаму. Ова е само прво коло и треба да работиме напорно, како што кажа нашиот тренер. Верувам дека имаме квалитет, но имаме многу нови играчи кои треба да се адаптираат оваа сезона. Ова е само почетокот од сезоната, секој натпревар ќе биде дерби, на никој нема да му биде лесно и одиме понатаму. Пелистер и нашиот дрес многу ,, тежи ” и се знае кон што тежнееме, во тоа веруваме и одиме понатаму со кренати глави.“- изјави Кузмановски за Спортска Мрежа.
Со освоениот бод Пелистер ја отвори сезоната без пораз на едно од потешките гостувања во лигата. Кузмановски, пак, со 10 гола покажа дека повторно ќе биде една од главните фигури во нападот на битолскиот тим, кој сега продолжува со подготовките за следните предизвици.
