Брегалница продолжува да го комплетира својот состав, а ново име во офанзивната линија е Натаниел Лоренцо, 21-годишниот фудбалер кој во Штип пристигнува од Канада и денес официјално беше промовиран како нов член на „сините“.
Лоренцо зад себе има интересен фудбалски пат. Првите чекори ги направил во Pro Stars Toronto FC, од каде заминува во Европа, каде што продолжува да се развива во младинскиот погон на Ѓер. Потоа следува ангажман во Татабања, а сега својата кариера ќе ја продолжи во македонскиот фудбал, во дресот на Брегалница.
Станува збор за млад и перспективен офанзивец кој може да игра на сите позиции во нападот. Брзината, енергијата и желбата за докажување се дел од неговите карактеристики, а во Брегалница веруваат дека неговите квалитети ќе донесат дополнителен импулс во играта и поголема опасност пред противничките голови.
Лоренцо веќе извесен период работи со штипскиот тим и се подготвува со своите нови соиграчи, но неговата официјална регистрација беше одложена поради административни и бирократски процедури. Сега сите формалности се завршени, па 21-годишниот Канаѓанец е и официјално на располагање на стручниот штаб.
За Брегалница ова е уште еден потег насочен кон создавање конкурентен состав, а од младиот канадски напаѓач се очекува во продолжението од сезоната да ја оправда довербата и да донесе свежина во офанзивниот дел од тимот.
