Екипата на Шкендија Арачиново ја очекува нов тежок предизвик во 5. коло од Првата македонска лига. Дебитантот во елитата гостува во Куманово, каде што ќе ги одмери силите со Башкими во обид да дојде до позитивен резултат.
По поразот од Струга Трим Лум на стартот од сезоната, тимот од Арачиново влезе во подобар ритам, освојувајќи бод против Силекс во Скопје (1-1), а потоа приреди и големо изненадување со победата над Тиквеш во Кавадарци (0-1). Сепак, поразот од Арсими со 0-2 на стадионот во Чаир ја прекина позитивната серија и ја врати потребата од дополнително засилување на тимот.
Раководството на клубот реагираше брзо и во финишот од преодниот рок донесе три нови имиња, по едно во секоја линија од тимот.
Во нападот пристигна 29-годишниот Ремзифаик Селмани, искусен голгетер кој во кариерата настапуваше за Шкендија Тетово, Ренова, Беса Добридол, Гостивар и Арсими. Од него се очекува да донесе поголема ефикасност и дополнителна свежина во офанзивата.
Одбраната е засилена со Абдул Руватубјаје, дефанзивец кој добро ги познава условите во македонскиот фудбал, со оглед на претходните настапи за Шкупи и АП Брера.
Во средниот ред, пак, се враќа Амир Нухију, од кого во Арачиново очекуваат поголема креативност, идеја и разновидност во играта.
Со трите нови засилувања, Шкендија Арачиново се надева дека ќе ја стабилизира формата и ќе дојде до нови бодови во продолжението од сезоната. Првата можност е уште денеска, на гостувањето кај Башкими во Куманово.
Натпреварот ќе се игра на стадионот во Куманово со почеток во 16:30 часот. Главен судија ќе биде Стојанче Трпчевски.
