Ракометарите на Младост од Богданци со победа ги завршија подготовките пред стартот на новата сезона во Суперлигата 2026/27, откако во последниот контролен натпревар славеа над МРК Куманово со 23:19.
Пред полната сала „Млаз“, домашниот состав одигра борбен, дисциплиниран и цврст натпревар во одбраната, а на полувреме Младост имаше предност од 11:8.
Богданчани продолжија во ист ритам и во вториот дел, во кој успеаја да ја зголемат предноста и до седум голови разлика, со што го скршија отпорот на гостите. Во завршницата тренерот Горан Андоновски им даде шанса и на дел од кадетите и пионерите, кои добија дополнително искуство пред стартот на сезоната. Младост на крајот заслужено славеше со 23:19 и на најдобар можен начин го заокружи подготвителниот период.
По враќањето во македонската ракометна елита, Младост 1977 влегува во новата сезона со голема мотивација и позитивна атмосфера. Подготовките се завршени, тестовите се зад тимот, а сега следува она за што се работеше цело лето – Суперлигата 2026/27!
