Екипата на Шкендија сака да продолжи во победнички ритам и да ја задржи максималната серија во домашниот шампионат. Тетовци се единствениот тим со четири победи од исто толку одиграни натпревари, а во петтото коло ги очекува незгодно гостување во Кратово.
Противник ќе биде Силекс, кој на домашен терен ќе се обиде да му зададе прв удар на актуелниот лидер и да го сопре налетот на „црвено-црните“.
„Секако дека мора да продолжиме во овој ритам. Не се покажавме во право светло во Конференциската лига, па затоа целиот тим е гладен за успеси. Сакаме победа на секој натпревар и посакуваме да ја завериме шампионската титула уште пред крајот на првенството. Ова е само почеток и верувам дека пред нас е исклучително успешна сезона“, истакна Нзенгуе.
Напаѓачот игра во одлична форма и веќе постигна 3 гола на првите 4 натпревари од новата сезона, додека Шкендија суверено е на чело на табелата со максимални 12 бода. Офанзивецот посакува континуитет на перфектниот старт во ПМФЛ.
„Пред сè, ја сакаме победата. Неопходни ни се сите три бода и верувам дека нè очекува квалитетен натпревар. Имам целосна доверба во соиграчите и во стручниот штаб. Одиме по триумф, тоа е единственото нешто што ме интересира – да победиме и да продолжиме по истиот пат. Се разбира, успехот на тимот е на прво место. Дури и да не се запишам во стрелците, најважно е екипата да слави. Тимот е секогаш пред секој поединец“, заклучи Нзенгуе.
Инаку, ова ќе биде јубилејна 50-та меѓусебна пресметка меѓу овие два ривала. Во досегашните 49 дуели, Шкендија е поуспешна со 33 победи, Силекс триумфирал на 5 меча, додека 11 средби завршиле без победник. Натпреварот меѓу Силекс и Шкендија се игра денес со почеток од 16:00 часот.
