По гостувањата кај Вардар и Шкендија, за Брегалница следува уште едно исклучително тешко гостување – кај Струга ТЛ. Распоредот не беше нималку наклонет кон штипјани, кои во првите пет кола мораа да се соочат со трите најдобри екипи од минатата сезона.
Брегалница досега нема освоено бод на гостински терен, па денешното гостување во Струга е нова можност за „сините“ да го прекинат негативниот тренд и да стигнат до првите бодови надвор од својот терен.
Екипата од Штип е свесна дека мора да почне да освојува бодови и на гостувањата, особено ако сака да остане конкурентна во првенството. Досега сите шест освоени бодови Брегалница ги освои на домашен терен, со победите над Арсими и Башкими.
„Солидно ја почнавме сезоната, но мораме да почнеме да земаме бодови и на гостувањата. Свесни сме дека утре се среќаваме со добра екипа, која е тешка да се победи особено на нејзин терен, но ние ќе влеземе во натпреварот со бистри глава и со една цел – победа. Брегалница мора да биде трпелива и концентрирана во текот на сите 90 минути, и грешките да ги сведе на минимум“, рече Методи Максимов.
Крилниот фудбалер потенцира дека е задоволен од настапите откако се врати во Штип.
„Задоволен сум од моите изданија, одигра три меча на кои запишав 1 гол и две асистенции, и се надевам дека ќе продолжам со добрите партии“, рече Максимов.
Фудбалерот на Брегалница вели дека целта е да бидат меѓу првите пет екипи во сезоната.
„Нашата цел е да бидеме во горниот дел на табелата. Дома играме добро, остваривме две победи, а на гости имавме тежок распоред, игравме со двете најдобри екипи, а сега играме и со третата најдобра екипа. Но, јас се надевам дека ќе почнеме да освојуваме бодови и на гостински терен“, вели Максимов.
