Клубот е создаден со јасна визија и цел повторно да се изгради силен фудбалски колектив кој со гордост, посветеност и амбиција ќе го претставува градот.
Идејата за формирање на клубот е иницирана од Робертино Илиоски, кој ќе ја извршува функцијата претседател на ГФК Победа. Во раководната структура како членови се именувани Игор Стеванов, Роберт Талески, Валентин Колевски и Иванчо Младеновски, кои заедно со Илиоски ќе го поставуваат темелот на новиот прилепски фудбалски проект.
На чело на стручниот штаб ќе биде Филип Мирчевски, кој ќе има задача да го предводи тимот и да ја постави играчката и спортската визија на клубот.
Посебен акцент ќе биде ставен и на младинскиот погон. Тони Наумоски ќе биде задолжен за регрутација и развој на младите категории, со посебен фокус на пионерите и кадетите. Во рамки на клубот ќе бидат вклучени и младите фудбалери од генерациите 2010, 2011 и 2012, кои ќе добијат можност да се натпреваруваат, да се развиваат и во иднина да бидат основата на сениорскиот тим.
ГФК Победа уште од самиот почеток најавува проект кој нема да биде насочен само кон резултатите, туку и кон создавање сопствена база на млади и перспективни фудбалери. Целта е постепено да се гради стабилен клуб кој ќе има препознатлив идентитет и ќе биде достоен претставник на прилепскиот фудбал.
Новоформираниот ГФК Победа својата прва сезона ќе ја започне во Третата македонска фудбалска лига, од каде што ќе го започне патот кон остварување на амбициите и повторно враќање на Прилеп меѓу фудбалските центри во Македонија.
