Охрид утре го очекува вториот предизвик во Регионалната лига, а по успешниот старт против Војводина, охриѓани гостуваат кај Будванска Ривиера во Црна Гора. Натпреварот во Будва е закажан за 19:00 часот, а избраниците на Борис Ројевиќ влегуваат со јасна цел – нова победа.
Охрид во првото коло славеше над Војводина со 36-30, па со позитивна атмосфера го очекува и вториот натпревар во новото регионално натпреварување. Пред гостувањето во Будва, Ален Ќосевски од таборот на охриѓани потенцираше дека тимот е подготвен за борба и дека колективниот пристап ќе биде еден од клучевите за успех.
„Ќе дадеме се од себе, ќе играме како еден тим и ќе ја почитуваме секоја топка. Победа е наша цел“, порача Ќосевски.
Охриѓани во Будва ќе се обидат да ја продолжат победничката серија и со нови два бода да направат уште еден чекор кон врвот во групата Б.
Натпреварот меѓу Будванска Ривиера и Охрид ќе се одигра утре од 19:00 часот во спортскиот центар во Будва.
