Женската сениорска репрезентација на Македонија го претрпе и вториот пораз на Медитеранските игри во Таранто. По неуспехот против Турција на стартот, избраничките на селекторот Милош Гавриловиќ загубија и од Косово со 1:3 (28:30, 17:25, 25:19, 16:25) во второто коло од групната фаза.
Македонија имаше добри моменти, но големите осцилации во играта, проблемите со приемот и одбраната во поле, како и недоволно ефикасниот блок, повторно беа пресудни. Ова е трет пораз на Македонија од Косово во летниот период, а интересен е податокот дека и трите натпревари завршија со идентични 1:3.
Првиот сет беше најнеизвесен и донесе голема борба до самиот крај. Македонија имаше предност од 10:8, но Косово успеа да израмни и подоцна да поведе со 11:14. Нашата репрезентација возврати со серија и стигна до 21:20, но противникот повторно ја презеде иницијативата. Во драматичната завршница Македонија спаси неколку сет-топки, но по една неискористена можност за освојување на сетот, Косово славеше со 28:30.
Вториот сет започна лошо за Македонија, која дозволи Косово да поведе со 1:5. Успеавме да се вратиме на 6:6, но потоа повторно следуваше пад во играта. Приемот не функционираше најдобро, а недостасуваше и вистинска реакција на мрежата, што гостинките го искористија за да стигнат до убедлива предност. Косово го освои сетот со 17:25 и поведе со 0:2.
Македонија сепак покажа карактер во третиот сет. По почетниот негатива, приемот беше стабилизиран, а со тоа се подобри и играта во нападот. Милевска и Ковачевиќ, со поддршка од Атанасова и Стојкоска, ја однесоа Македонија до убедливо водство од 12:6. Иако Косово успеа да намали на 15:12, нашите одбојкарки повторно ја зголемија разликата и со 25:19 намалија на 1:2 во сетови.
Наместо целосен пресврт, четвртиот сет донесе нов пад. Македонија беше рамноправна само во почетните минути, по што Косово ја презеде контролата. Големиот број грешки и слабата реализација во нападот не дозволија Македонија да се врати во мечот. Косово го доби сетот со 16:25 и со тоа ја запиша победата од 1:3.
Најефикасна во македонскиот состав беше Андротеа Милевска со 20 поени. Љиља Ковачевиќ постигна 15, Тамара Атанасова 10, додека Ива Стојкоска заврши со девет поени.
Македонија следниот натпревар на Медитеранските игри во Таранто го игра в среда од 19:00 часот против селекцијата на Грција.
