Охрид ја продолжи традицијата и по вторпат во низа го освои меморијалниот турнир „Крсте Андоновски“, откако во финалето го совлада Вардар со 29-27 (12-10). „Гладијаторите“ во неизвесен натпревар успеаја да го задржат водството и да го одбранат трофејот освоен минатата година. Меѓу стрелците се запиша и Ален Ќосевски со четири погодоци.
По освоениот трофеј, ракометарот на Охрид, Ќосевски, во изјава за „Спортска Мрежа“ го истакна квалитетот на финалето, фер играта на двете екипи и заслужената победа на Охрид.
„Во ова финале имаше доста добра игра од двете страни, како во одбрана, така и во напад. Двете екипи максимално се залагаа. Сакам да ѝ честитам на екипата на Вардар за фер и коректната игра. Ние, според мене, мислам дека го дадовме нашиот максимум и заслужено го освоивме овој турнир. На секој меч го дававме нашиот максимум и се надевам дека истото ќе го продолжиме и во првенството што ни следува.“- изјави Ќосевски за Спортска Мрежа.
Охрид, сега се насочува кон нова пресметка со Вардар, бидејќи двете екипи ќе играат и за трофејот во Суперкупот, закажан за 19:00 часот во салата „26 Април“ во Гевгелија.
