ОК Струмица 47&72 продолжува да го комплетира составот за новата сезона, а клубот го потврди враќањето на добро познато име – Филип Маџунков повторно ќе го носи сино-белиот дрес.
Средниот блокер потекнува од Струмица, каде што ги направи своите први одбојкарски чекори, а низ годините изгради богато домашно и интернационално искуство. Во Македонија настапуваше за Вардар и Струмица, додека во странство беше дел од белгискиот Леувен, како и од австрискиот АИЧ, со кој стигна до титулата вицешампион на Австрија.
Маџунков со своите настапи, борбеност и карактер остави трага во клубовите за кои настапуваше, а неговото враќање во Струмица претставува дополнително засилување за тимот во пресрет на новата натпреварувачка сезона.
Од ОК Струмица 47&72 посочуваат дека со враќањето на Маџунков во „сино-белото семејство“ добиваат искусен играч кој добро ги познава клубот и средината, но и одбојкар кој зад себе има значајно искуство од настапите надвор од Македонија.
Навивачите повторно ќе имаат можност да го гледаат Маџунков во дресот на струмичкиот клуб, овојпат со нови амбиции и предизвици во сезоната која следува.
