ГРК Вардар Неготино и официјално го назначи Аце Станковски за нов шеф на стручниот штаб, откако искусниот македонски стратег во последен момент постигна договор со раководството на клубот и ја одржа првата прозивка со ракометарите во спортската сала при СОУ „Св. Кирил и Методиј“.
Иако како сериозна опција за тренерската функција се споменуваше и Игор Котевски, неготинскиот клуб на крајот се одлучи довербата да му ја укаже на Станковски, тренер кој добро ја познава средината бидејќи и претходно го предводеше клубот од Неготино.
Последниот тренерски ангажман Станковски го имаше во МРК Куманово, каде покрај работата со сениорскиот тим беше вклучен и во развојот на младинските категории. Како играч остави длабока трага во македонскиот и југословенскиот ракомет, настапуваше за репрезентациите на Македонија и поранешна Југославија, а еден од неговите најголеми успеси е бронзениот медал освоен на Светското младинско првенство во 1985 година.
Минатата сезона Вардар Неготино амбициозно влезе во трката за враќање во Супер лигата, но со текот на сезоната тимот излезе од победничкиот ритам и не успеа да остане во конкуренција за највисок пласман, завршувајќи ја сезоната на петтото место во Првата лига.
Во новата сезона целите повторно се високи. Во Неготино веќе започнаа со создавање тим кој ќе може сериозно да конкурира за промоција во македонската ракометна елита, а ангажманот на Аце Станковски е јасен показател за амбициите на клубот.
Според информациите на Спортска Мрежа, раководството веќе работи и на засилување на играчкиот кадар, при што се остваруваат контакти со повеќе ракометари кои би можеле да го облечат дресот на Вардар Неготино во претстојната сезона. Со искусен тренер и најавените засилувања, клубот ќе се обиде повторно да се вклучи во битката за место во Супер лигата.
