Македонскиот спорт доби уште едно големо меѓународно признание. Претседателката на Федерацијата на училишен спорт на Македонија, Елена Мицковска, е избрана за член на Управниот одбор на Светската федерација за училишен спорт (ISF), највисокото управувачко тело на оваа организација.
Одлуката беше донесена на првиот состанок на новиот Извршен одбор на ISF, кој се одржа во Белград, каде што беше формирана управувачката структура за новиот четиригодишен мандат, кој ќе трае до 2030 година.
На состанокот беше одлучено Елена Мицковска, заедно со Олабиси Џозеф од Нигерија, да бидат претставници на Извршниот одбор во Управниот одбор на ISF – највисокото тело задолжено за стратешкото управување со Светската федерација.
Овој избор претставува историски успех за Македонија, бидејќи за првпат наш претставник ќе биде дел од највисокото раководно тело на Светската федерација за училишен спорт. Воедно, тоа е признание за досегашната работа на Федерацијата на училишен спорт на Македонија и потврда за нејзиниот углед на меѓународната спортска сцена.
Со конституирањето на Управниот одбор, ISF ја заокружи клучната фаза од воспоставувањето на својата раководна структура за новиот мандат до 2030 година.
Новиот управен одбор е составен од:
- Претседател: Жељко Танасковиќ
- Потпретседател: Антонио Хора Фило, Јусеф Белкасими и Лианшуаи Тенг
- Претставници на Извршен одбор: Елена Мицковска Олабиси Џозеф
- Генерален секретар: Хаснаех Ел Ајуби
