Шкендија успешно ја заврши својата задача во првото квалификациско коло од Конференциската лига, откако и на реваншот славеше над Европа од Гибралтар со 1-0 и со убедливи 6-0 во вкупниот резултат обезбеди место во следната рунда од натпреварувањето.
По убедливите 5-0 на првиот натпревар, тетовчани без поголем притисок го дочекаа реваншот во Скопје. Избраниците на стратегот на Шкендија имаа контрола врз играта во текот на целиот натпревар, но гостите успешно се бранеа и не дозволуваа многу чисти можности пред својот гол.
Во првото полувреме најдобрата шанса ја имаше Нзенгуе, кој не успеа да ја искористи грешката на противничкиот голман, додека Европа најчесто се закануваше со удари од далечина, кои без проблем ги неутрализираше Амзаи.
Во продолжението Шкендија продолжи да притиска, а најблиску до погодок беше Зејнулаи во 66. минута, кога неговиот удар заврши во пречката. Отпорот на гостите конечно беше скршен во 86. минута, кога Ване Крстевски по одлична индивидуална акција се избори за простор и со прецизен удар ја затресе мрежата за конечни 1-0.
Со новата победа, Шкендија го потврди квалитетот и без примен гол го мина првиот европски предизвик ова лето. Во второто квалификациско коло од Конференциската лига, македонскиот претставник ќе се соочи со словенечкиот Браво, а првиот натпревар ќе го одигра на гостински терен.
