По подолг период, фудбалот повторно ќе се игра во село Зубово. ФК Струмешница и официјално се реактивира и од претстојната сезона ќе се натпреварува во Општинската фудбалска лига во Струмица, со што се враќа долгогодишната фудбалска традиција во ова струмичко село.
Повторното активирање на клубот е овозможено благодарение на поддршката од Општина Ново Село, како и на локалните компании и општествено одговорни луѓе кои ја препознаа важноста на спортот и создавањето подобри услови за младите. Со враќањето на Струмешница, неделите повторно ќе бидат резервирани за фудбалски возбудувања и натпревари во Зубово.
Во наредниот период клубот ќе ги објави составот на екипата, стручниот штаб, како и планот за подготовките и пријателските натпревари.
Првиот контролен натпревар е веќе закажан. На 19 јули (недела), со почеток од 18:00 часот во Зубово, ФК Струмешница ќе одигра пријателски натпревар против екипата на ФК Радово, што ќе биде прва можност навивачите повторно да го видат својот клуб на терен.
„Со големо задоволство ја известуваме јавноста дека ФК Струмешница – с. Зубово повторно се враќа на фудбалските терени и од претстојната сезона ќе се натпреварува во Општинската фудбалска лига. Повторното активирање на клубот е овозможено благодарение на поддршката од Општина Ново Село, како и на локалните компании и општествено одговорни луѓе кои ја препознаа важноста на спортот и развојот на младите. Во наредниот период ќе следуваат информации за составот на екипата, стручниот штаб и распоредот на пријателски натпревари. Ги покануваме сите наши навивачи, поранешни фудбалери, пријатели и поддржувачи да бидат дел од ова ново поглавје и заедно да ја вратиме фудбалската традиција во село Зубово“, велат од клубот.
