Фудбалскиот клуб Силекс ќе има максимална поддршка од своите навивачи на реванш натпреварот против Динамо Минск во првото квалификациско коло од УЕФА Конференциската лига. Кратовци соопштија дека сите билети за натпреварот се целосно распродадени, па на ФФМ Тренинг центарот „Петар Милошевски“ во Скопје се очекува одлична атмосфера и исполнети трибини.
Екипата на Силекс ќе влезе во реваншот со гол предност, откако на првиот натпревар славеше со минимални 0:1 против Динамо Минск. Македонскиот претставник сега пред своите навивачи ќе се обиде да го завери пласманот во следната квалификациска рунда од Конференциската лига.
Од клубот преку официјално соопштение им се заблагодарија на навивачите за огромниот интерес и поддршката.
„ФК Силекс ја известува јавноста дека сите влезници за реванш натпреварот од првото квалификациско коло во УЕФА Конференциската лига помеѓу ФК Силекс и ФК Динамо Минск се целосно распродадени!
Ви благодариме за огромната поддршка. Во четврток очекуваме исполнети трибини и силна атмосфера на ФФМ Тренинг центарот „Петар Милошевски“ во Скопје.
Заедно да го бодриме Силекс на европската сцена!“
Со распродадените билети, кратовскиот состав ќе има дополнителен мотив во борбата за нов европски успех и пласман во следната фаза од натпреварувањето. Натпреварот се игра во четврток со почеток од 20 часот.
