Ракометниот клуб Тиквеш го дозна својот прв противник во новата сезона од ЕХФ Европскиот куп. По денешната ждрепка одржана во седиштето на Европската ракометна федерација во Виена, кавадаречкиот состав за ривал го доби тимот на Еш од Луксембург.
Македонскиот претставник ќе го започне европскиот настап уште од првото квалификациско коло, а првиот натпревар ќе се одигра во Кавадарци на 12 или 13 септември, додека реваншот е закажан за 19 или 20 септември во Луксембург.
Тиквеш на ждрепката беше меѓу неносителите, но избегна неколку поквалитетни противници, па дуелот со Еш се оценува како поволен за кавадаречкиот тим во битката за место во следната рунда.
Еш минатата сезона го освои четвртото место во шампионатот на Луксембург, а Тиквеш ќе се обиде да ја искористи предноста на домашниот терен во првиот натпревар за да направи чекор кон пласман во второто коло.
Покрај Тиквеш, Македонија ќе има уште три претставници во ЕХФ Европскиот куп. Бранителот на трофејот Охрид, како и Алкалоид и Бутел Скопје, се директно пласирани во второто коло, а своите противници ќе ги дознаат на ждрепката закажана за 22 септември.
