Шпанскиот интернационалец Ориол Реј официјално, повеќе нема да биде дел од ГРК Охрид, откако кариерата ќе ја продолжи во полскиот шампион Висла Плок. Полскиот клуб ја активирал откупната клаузула од неговиот договор и така го обезбеди неговиот потпис.
До трансферот дојде откако Висла Плок остана без планираното засилување. Матеј Хавран од Татабања требаше да се пресели во полскиот гигант, но поради повредата трансферот пропадна, па клубот мораше експресно да најде ново решение за пивотменската позиција.
Иако останува без еден од своите најважни дефанзивци, охридскиот клуб ќе добие финансиска отштета. Во договорот на Реј постоела откупна клаузула, која Висла Плок ја искористила за да го реализира трансферот.
Охриѓани веќе имаат план како да ја пополнат празнината во составот. Во дефанзивните задачи поголема улога ќе има Филип Талески, додека на пивотменската позиција минутажата ќе ја преземе новото засилување, Јапонецот Шуичи Јошида.
Реј во изминатиот период беше едно од најважните имиња во одбраната на ГРК Охрид и остави значаен белег во успесите на клубот, пред новиот предизвик во полскиот шампионат.
