Женската сениорска одбојкарска репрезентација на Македонија ова лето ја очекува вториот предизвик – настапот на 20. Медитерански игри, кои ќе се одржат од 21 август до 3 септември во Таранто, Италија.
Селекторот Милош Гавриловиќ го објави списокот од 16 одбојкарки кои ќе конкурираат за настап на ова престижно натпреварување. Во однос на составот што настапуваше во Европската лига 2026 има неколку промени. Дел од помладите репрезентативки нема да бидат на располагање бидејќи во истиот период ќе настапуваат за селекцијата до 20 години во зонските квалификации за Европското првенство 2027. Во тимот повторно се враќа искусната Тамара Атанасова (поранешна Стојанова), додека на списокот овојпат ја нема Теа Терзиевска.
Првиот собир на репрезентацијата е закажан за 27 јули во 13:00 часот во хотелот „Континентал“ во Скопје, каде ќе започнат подготовките за настапот во Таранто.
Македонија ќе се натпреварува во групата Б, заедно со селекциите на Турција, Грција, Алжир и Косово. Во групата А се наоѓаат домаќинот Италија, Србија, Египет, Босна и Херцеговина и Сирија.
Натпреварите од групната фаза ќе се играат од 23 до 29 август, додека елиминациските дуели и финалето се закажани за периодот од 30 август до 1 септември. Организаторот дополнително ќе го објави деталниот распоред на натпреварите.
За македонската женска репрезентација ова ќе биде втор последователен настап на Медитеранските игри, откако претходно учествуваше на изданието во Оран, Алжир, во 2022 година.
