Тројцата млади фудбалери на ФК Овче Поле од Свети Николе – Тино Николов, Благојче Гроздевски и Јоаким Колев – успешно го завршија својот настап на кампот на Реал Мадрид, кој се одржа во Краљево, Србија, во периодот од 29 јуни до 3 јули.
Талентираните фудбалери, родени во 2015 година, имаа можност да тренираат според официјалната методологија на Реал Мадрид, под водство на тренери од Шпанија. Освен што ги усовршуваа своите фудбалски вештини, децата стекнаа нови знаења, драгоцено искуство, создадоа нови пријателства и имаа можност да ја почувствуваат работата по највисоки европски стандарди.
Одличниот впечаток што го оставија на кампот им донесе уште една голема награда. Тино Николов, Благојче Гроздевски и Јоаким Колев ќе бидат дел од кампот на Реал Мадрид во Мадрид, кој ќе се одржи од 2 до 7 јануари, каде повторно ќе работат со стручниот кадар на шпанскиот гигант и ќе имаат можност дополнително да го надградуваат својот талент.
Ова претставува големо признание како за младите фудбалери, така и за ФК Овче Поле, кој продолжува успешно да работи со најмладите категории и да создава услови за нивен правилен фудбалски развој.
