Младинската школа на Тетекс продолжува со својата организациска поставеност за новата сезона, а нов тренер во клубот ќе биде Даниел Радески, кој ќе ја предводи генерацијата родени 2011 година.
Радески повторно се враќа во добро позната средина, откако во минатото беше шеф на стручниот штаб на сениорскиот тим на Тетекс, а работеше и како тренер во младинската школа на клубот. Во својата тренерска кариера беше дел и од фудбалската академија Партизан Југ од Брвеница, каде што стекна дополнително искуство во работата со млади фудбалери.
Координатор на младинската школа на Тетекс ќе биде Тони Јакимовски, а Радески истакнува дека токму визијата и искуството на Јакимовски биле една од главните причини да ја прифати понудата и повторно да стане дел од клубот.
„Имаме за цел школата да ја подигнеме на едно високо и професионално ниво, познавајќи го Тони Јакимовски и неговото искуство и фудбалско реноме, не се двоумев многу да ја прифатам понудата од негов страна да се приклучам во младинската школа. Се надевам дека со заеднички сили ќе ја подигнеме школата на едно респектабилно ниво и во иднина ќе биде сервис за играчи на првиот тим“, изјави Радески за Спортска Мрежа.
Со неговото доаѓање, Тетекс продолжува да го засилува стручниот кадар во младинската школа, со јасна определба да создава квалитетни млади фудбалери и во иднина да обезбедува играчи за сениорскиот тим.
