Младиот македонски репрезентативец Матеј Гаштаров ја продолжи верноста со српскиот шампион Црвена Звезда, откако потпиша нов договор кој ќе важи до 2029 година.
Гаштаров во белградскиот гигант пристигна пред две години како еден од најперспективните македонски таленти, а со своите настапи и континуиран напредок успеа да се избори за место и во првиот тим на „црвено-белите“.
Деветнаесетгодишниот играч за врска се наоѓа во одлична форма и важи за еден од најталентираните фудбалери од својата генерација. Со своите игри го привлече вниманието на стручниот штаб, кој му ја укажа довербата со долгорочен договор.
Гаштаров е дете на Вардар, каде ги направи првите фудбалски чекори, а неговиот развој во Црвена Звезда претставува уште една потврда за неговиот голем потенцијал.
Новиот договор до 2029 година е јасен показател дека српскиот шампион сериозно смета на македонскиот младински репрезентативец и во наредните сезони.
