Освојувачот на Купот на Македонија, Силекс, направи голем чекор кон пласманот во следното квалификациско коло од УЕФА Конференциската лига, откако славеше со минимални 1:0 против Динамо Минск во првиот натпревар одигран на неутрален терен во Стара Загора, Бугарија.
Кратовци одиграа дисциплиниран и тактички зрел натпревар, успевајќи да го неутрализираат белорускиот претставник и да стекнат значајна предност пред реваншот. Единствениот погодок беше постигнат во 42. минута, кога новото засилување Есмир Хасукиќ сигурно реализираше удар од белата точка.
Најстрогата казна беше досудена по прекршок врз Борјан Пановски во противничкиот шеснаесетник, а Хасукиќ не погреши и му донесе вреден триумф на македонскиот претставник.
Во второто полувреме Динамо Минск имаше повеќе иницијатива, но не успеа сериозно да ја загрози одбраната на Силекс, која сигурно ја сочува минималната предност до последниот судиски свиреж.
— goals (@StefanDaskalov5) July 9, 2026
Реваншот меѓу Силекс и Динамо Минск ќе се одигра следната недела на тренинг-центарот „Петар Милошевски“ при Фудбалската федерација на Македонија во Скопје, каде кратовци ќе ја бранат стекнатата предност и ќе се обидат да обезбедат место во следната рунда од Конференциската лига.
