Македонскиот вицешампион Шкендија направи одличен чекор кон пласман во второто квалификациско коло од УЕФА Конференциската лига, откако на гостувањето во Гибралтар ја декласира Европа со убедливи 5:0.
Избраниците на Артим Положани одиграа сигурен и доминантен натпревар, во кој уште еднаш ја потврдија фаворитската улога и практично го решија прашањето околу победникот во двомечот уште по првиот натпревар.
По неколку воведни обиди на двете страни, Шкендија поведе во 28. минута преку Ндзенге, кој успешно ја заврши одличната акција на тетовскиот состав за предност од 1:0 на полувремето.
Во продолжението, гостите целосно ја презедоа контролата. Фабрис Тамба беше двоен стрелец, погодувајќи во 52. и 75. минута, додека новото засилување Алмир Криезиу во 83. минута го постигна својот дебитантски погодок во дресот на Шкендија. Конечните 5:0 ги постави искусниот Бесарт Ибраими во самиот финиш на натпреварот.
Со оваа убедлива победа, Шкендија е на чекор до пласман во следната квалификациска рунда, каде што, доколку ја потврди предноста, ќе се соочи со словенечки Браво.
Реваншот меѓу Шкендија и Европа ќе се одигра следниот четврток на Националната арена „Тодор Проески“ во Скопје, каде тетовци ќе имаат можност само да ја заверуваат визата за продолжување на европскиот настап.
