Бутел Скопје продолжува да го гради тимот за новата сезона, а најнови засилувања во редовите на суперлигашот се младите ракометари Андреј Ѓорѓески и Тодор Аксентиев.
Двајцата имаат по 19 години и потпишаа договори со клубот на две сезони, со што ќе го носат дресот на Бутел Скопје најмалку до летото 2028 година.
Ѓорѓески игра на позицијата лев бек и пристигнува од Алкалоид, додека Аксентиев настапува како десен бек и доаѓа од Мулти Есенс.
Со ангажманот на двајцата перспективни бекови, Бутел Скопје уште еднаш ја потврдува определбата да инвестира во развојот на млади македонски ракометари, кои во наредните сезони ќе имаат можност да се наметнат во суперлигашката конкуренција.
Во досегашниот дел од преодниот рок, клубот ги продолжи договорите со Теодор Тодески, Давид Јаневски, Марко Каевски, Дејан Михајловиќ и Бојан Спасовски, а претходно ги засили своите редови и со голманите Марко Богдановски и Градимир Чаневски. Под водство на новиот тренер Стојанче Стоилов, скопскиот состав постепено го комплетира ростерот за претстојната сезона.
