Со максимален учинок од шест победи на исто толку натпревари, македонската сениорска кошаркарска репрезентација убедливо ја заврши првата рунда од претквалификациите за пласман на Евробаскет 2029. Како првопласирана селекција во групата „А“, Македонија обезбеди место во втората фаза од квалификацискиот циклус.
По завршувањето на првата рунда, познати се четирите репрезентации кои директно изборија пласман понатаму. Покрај Македонија, во следната фаза се пласираа и Словачка, Бугарија и Норвешка.
Шесте преостанати селекции од првата рунда ќе ја продолжат борбата преку третата рунда од претквалификациите, која ќе се одигра по комплетирањето на вториот квалификациски круг.
Во втората рунда ќе настапат вкупно 12 репрезентации, поделени во четири групи со по три селекции. На четирите победници од првата рунда ќе им се приклучат и осумте репрезентации кои квалификациите за Светското првенство 2027 ги завршија на четвртото место во своите групи.
Со тоа е познат и кругот на потенцијални противници на Македонија. На претстојната ждрепка, нашата репрезентација може да биде извлечена во група со Данска, Романија, Швајцарија, Велика Британија, Кипар, Белгија, Австрија или Чешка.
Ждрепката за формирање на групите од втората рунда на претквалификациите за Евробаскет 2029 ќе се одржи на 15 јули, кога Македонија ќе ги дознае своите противници и распоредот на натпреварите во новата фаза од квалификациите.
УЧЕСНИЦИ ВО ВТОРА РУНДА – ПРЕТКВАЛИФИКАЦИИ 2029
МАКЕДОНИЈА
- Словачка
- Бугарија
- Норвешка
- Данска
- Романија
- Швајцарија
- Велика Британија
- Кипар
- Белгија
- Австрија
- Чешка
