По денови исполнети со возбудувања, атрактивни потези, многу погодоци и одлична атмосфера, утре (вторник) ќе биде спуштена завесата на уште едно успешно издание на турнирот во мал фудбал „Враништа 2026“.
На програмата се последните два натпревари кои ќе ги дадат конечните победници и ќе стават точка на овогодинешното издание на традиционалниот турнир.
Вечерта ќе започне во 21:30 часот со натпреварот за третото место, во кој силите ќе ги одмерат екипите на Инекс Олгица и Чардак Велгошти.
Еден час подоцна, односно во 22:30 часот, следува големото финале во кое за шампионскиот пехар ќе се борат АСП Пак и Кафе Бар 9, две екипи кои со своите настапи покажаа дека заслужено се дел од завршницата.
Во пресрет на финалната вечер, организаторите испратија порака до сите учесници, спонзори, поддржувачи и љубители на спортот:
„Утре ја испишуваме последната страница од приказната наречена Турнир Враништа 2026.
По денови исполнети со спорт, емоции, радост, навивање и незаборавни моменти, дојде време за финалната вечер. Утре вечер ќе ги дознаеме конечните победници и ќе ја спуштиме завесата на уште едно успешно издание на нашиот традиционален турнир.
Најголемата победа не се само трофеите и освоените места, туку пријателствата, дружењето и спомените што сите заедно ги создадовме овие денови.
Од срце им благодариме на сите екипи, спонзори, поддржувачи, навивачи и посетители кои беа дел од Турнирот Враништа 2026. Вашата поддршка, насмевки и присуство му даваат посебна вредност на овој настан и го прават да живее од година во година.
Ве очекуваме утре да уживаме заедно во последната турнирска вечер, да ги поздравиме најдобрите и уште еднаш да покажеме дека Враништа е место каде спортот и заедништвото одат рака под рака“, велат организаторите на „Враништа 2026“.
Организаторите упатија посебна благодарност и до спонзорите кои помогнаа турнирот успешно да биде реализиран. Турнирот во мал фудбал „Враништа 2026“ годинава беше поддржан од BZ Group Macedonia, а беше потпомогнат и од голем број други спонзори и пријатели на спортот, на кои организаторите им изразија искрена благодарност за довербата и поддршката.
Сега останува уште финалната вечер, по која ќе бидат познати шампионот, освојувачите на медалите и најуспешните поединци на турнирот, а Враништа уште еднаш ќе покаже зошто овој турнир е еден од најпосетените и најпрепознатливите спортски настани во регионот.
