Овој викенд, поточно утре, во Градско ќе се одржи едно од најубавите детски фудбалски случувања во регионот – Стоби Куп 2026, турнир кој ќе обедини млади таленти, многу емоции и вистински спортски дух.
Натпреварите ќе се играат на стадион во Градско, а на турнирот ќе настапат шест генерации – 2013, 2014, 2015, 2016, 2017 и 2018 година. Вкупно 24 екипи ќе одиграат 36 натпревари, при што секоја генерација ќе брои по четири екипи кои ќе се натпреваруваат по систем „секој со секого“.
Секој тим ќе одигра по три натпревари во формат 1×30 минути, а почетокот на турнирот е закажан за 09:00 часот. Свеченото доделување на наградите ќе се одржи во 17:00 часот.
На турнирот ќе учествуваат екипите на ГФК Неготино, ГФК Тиквеш, ФК Форца од Штип, ФК Борец Јуниор од Велес, ФК Фортуна 2009 од Скопје, ФК Росоман и ГФК Градско, а организаторите најавуваат одлична атмосфера, многу голови и незаборавни моменти за сите учесници.
Организацијата ќе биде на високо ниво, а сите екипи ќе треба да бидат подготвени најмалку 15 минути пред почетокот на своите натпревари. Право на настап ќе имаат максимум 14 играчи по екипа, а задолжителна ќе биде идентификација со спортска легитимација или пасош.
Организаторот обезбедува медицински персонал, амбулантно возило и лиценцирани судии од ФФМ, со цел турнирот да помине во најдобар можен ред и во безбедна атмосфера за сите деца.
Секое дете учесник ќе добие медал за учество, додека најуспешните екипи ќе бидат наградени со пехари за освоено прво, второ, трето и четврто место. Покрај тоа, ќе бидат доделени и индивидуални признанија за најдобар играч, најдобар голман и најдобар стрелец.
Стоби Куп 2026 уште еднаш ќе покаже дека детскиот фудбал во Македонија има светла иднина и дека ваквите турнири се вистинска можност младите фудбалери да ги покажат своите таленти и љубовта кон спортот.
