На само едно коло до комплетирање на есенската полусезона во Втората фудбалска лига екипите на Вардарски, Борец и Осогово се „заковани“ на дното од табелата.
Вардарски е последен со само два бодови на своето конто, единствен тим кој нема триумф, со најлоша одбрана која примила дури 42 погодоци.
Борец е претпоследен со пет бодови на своето конто и скор од само една сезонска победа со две ремија и дури 11 порази, овој тим не ја има можеби најлошата одбрана која примила 25 гола, но затоа го има најкастрофалниот напад кој реализираше скромни шест погодоци на 14 натпревари.
Овие две екипи се во зоната за директно испаѓање во Трета лига, всушност двете екипи минатата сезона беа дел од Трета лига и преку баражите се пласираа во второлигашкото друштво, но како тргнало експресно може да се вратат.
Двете екипи на последните пет натпревари имаат пет порази, а Борец на последните пет кола постигна само еден гол.
Ниту Осогово не е нешто посјаен, кочанските „жетвари“ минатата сезона во последното коло го изборија опстанокот, но оваа сезона ќе бидат навистина во многу тешка ситуација, бидејќи баражот ќе биде многу тежок, а за опстанок на директен начин ќе имаат многу тешка задача.
Интересно е тоа што Осогово во последното есенско коло се среќава со „фенерџијата“ Вардарски во Богданци, каде во директен дуел Осогово освен победа не гледа ништо друго, впрочен ако Осогово и не триумфира тогаш дефинитивно пролетниот дел ќе биде навистина пеколен во Кочани.
Борец во последното коло ќе има тешка задача против Охрид на „Билјанини Извори“, каде охриѓани ќе ја имаат улогата на фаворити.
Осогово е во бараж зоната односно на 14-тото место со осум бодови, а триумф против Вардарски нема да значи прогрес, но ќе значи три важни бодови за во пролетниот дел да стартува во барем „за влакно“ полесна позиција на патот кон опстанокот.
Уште еднаш се потврдува дека има сериозна разлика околу квалитетот на Третата и Втората лига и дека влезот од Трета во Втора лига е сериозен чекор, каде покрај квалитетни играчи, потребни се стабилни финансии и добар план и стратегија на клубот.
В сабота ќе се одиграат натпреварите од последното 15. коло на Втората лига.
