Македонскиот интернационалец Дин Аломеровиќ и официјално ја продолжи соработката со УТА Арад, откако романскиот прволигаш објави дека новиот договор на левиот бек важи до 2028 година.
Аломеровиќ во Арад пристигна пред почетокот на актуелната сезона и за кратко време се етаблираше како еден од најстандардните и најзначајни играчи во тимот.
Македонецот сезонава забележа 35 настапи во романската Суперлига и Купот на Романија, при што постигна три гола и додаде четири асистенции.
Од клубот потенцираа дека со своите партии на теренот, големата посветеност и односот со навивачите, Аломеровиќ заслужил важно место во тимот на „старата дама“.
„Се чувствувам одлично и многу сум среќен што ќе ја продолжам кариерата тука, во УТА. Арад е посебен! Ако треба да ја опишам УТА со три збора, тоа би биле: емоција, големо срце и победнички дух“, изјави Дин Аломеровиќ по потпишувањето на новиот договор.
Раководството на УТА Арад изрази задоволство што соработката со македонскиот дефанзивец продолжува и во следните години, а новиот договор Аломеровиќ го потпиша во присуство на својот менаџер Денис Омерагиќ.
