Селекторот на македонската машка ракометна репрезентација, Кирил Лазаров, го соопшти поширокиот список на ракометари на кои ќе смета за претстојниот бараж дуел со Словачка, во битката за место на Светското првенство 2027.
На листата се најдоа вкупно 35 имиња, а дел од повиканите настапуваат и надвор од домашниот шампионат. Меѓу интернационалците се издвојуваат голманот Мартин Томовски, како и бековите Филип Талески и Мартин Карапалевски, кои се дел од клубови во европските лиги.
Меѓу повиканите голмани се Мартин Томовски, Никола Митревски, Васил Гогов, Иван Галевски и Марко Кизиќ. На крилните позиции од левата страна се најдоа Петар Атанасијевиќ, Иван Џонов, Гоце Ојлески и Марио Стојановски, додека десно конкурираат Ненад Костески, Ален Ќосевски, Александар Петковски и Никола Костески.
Во бековската линија, на левата страна, Лазаров ќе смета на Филип Кузмановски, Павле Атанасијевиќ, Филип Талески, Емилијан Ѓоргоски и Дејан Кукуловски. Организацијата на играта е доверена на средните бекови Дамјан Митев, Игор Ѓоргиев, Мартин Карапалевски, Марко Митев и Мартин Ивановски. На десната бековска позиција се Давид Савревски, Филип Николов, Томислав Јагуриновски, Мартин Велковски и Димитар Узунчев.
На линијата од шест метри изборот падна на Милан Лазаревски, Марко Стојковиќ, Самоил Ристевски, Жарко Пешевски и Валентин Карасманакис, додека во дефанзивниот дел се предвидени Михаил Аларов и Никола Маркоски.
Двомечот меѓу Македонија и Словачка е закажан за месец мај. Првата пресметка ќе се одигра на гостински терен на 13 мај, додека одлучувачкиот реванш ќе се игра четири дена подоцна, на 17 мај, во Скопје.
