Охрид е пред уште еден голем европски предизвик, натпревар што носи тежина, притисок, но и огромна можност за успех. Во пресрет на реваншот со Целје, атмосферата во тимот е фокусирана и борбена, а сите погледи се насочени кон саботниот дуел во „Билјанини Извори“, каде поддршката од трибините ќе има огромна улога.
Дефанзивецот од редовите на Охрид, Реј Моралес, очекува неизвесен натпревар сличен на првиот дуел, но нагласува дека тимот работел на корекција на грешките и верува дека со подобра адаптација на играта може да се дојде до посакуваниот резултат. Според него, полната сала ќе биде дополнителен мотив и фактор што може да ја направи разликата.
„Очекуваме тежок натпревар, можеби ќе биде сличен како последниот натпревар, кај нив. Имавме долг период во кој не се адаптиравме во нивниот систем, ама мислам дека ако научиме од грешките, ќе бидеме подобри. Салата ќе биде полна, што ќе ни помогне да бидеме подобри. Верувам дека имаме големи шанси“- изјави Моралес.
Со јасна верба и поддршка од трибините, Охрид ќе се обиде да го направи потребниот исчекор кон финалето. Сите предуслови за ракометен спектакл се тука – останува тимот да ја претвори шансата во резултат. Натпреварот се игра во сабота (02.05), во салата ,, Билјанини Извори”, со почеток од 19:00 часот.
