Дисциплинската комисија при Фудбалската федерација на Македонија донесе одлука да го казни ФК Башкими 1947 Куманово со забрана за играње на домашен терен во траење од четири натпревари, како и со парична казна од 5.000 евра.
Санкцијата следува поради слаба организација на натпреварот против ФК Струга Трим Лум, одигран во рамките на 28. коло од Првата МФЛ на 19 април 2026 година на стадионот „Башкими“ во Куманово. Дополнително, како причини се наведуваат присуство на неслужбени лица на теренот и во службените простории, како и физички напад врз претставници и фудбалери на гостинската екипа.
На истата седница, дисциплински мерки беа изречени и за членови на стручниот штаб на ФК Кожуф. Шефот на стручниот штаб, Иван Варадиновски, доби забрана за вршење на функцијата во траење од два натпревари, исто како и тренерот на голмани, Трајче Ников.
