Полуфиналниот натпревар во Македонска Каменица меѓу Каменица Саса и Љуботен не се одигра, бидејќи гостинскиот тим од Тетово не допатува во рударското гратче за да го одигра натпреварот.
Ова значи дека Каменица Саса службено го добива мечот со 3:0 и обезбедува место во големото финале каде ќе се соочи со Тиверија Брера, која како што веќе објави Спортска Мрежа го декласираше тимот на Топ Гол и ќе игра ново Куп финале.
Претходно, Љуботен во првенството славеше убедлива победа над Саса и објави дека тоа е последниот меч со интернационалки, а денешното недоаѓање во тимот во Македонска Каменица го отвара прашањето дали тимот воопшто и ќе игра во Првата женска фудбалска лига, а ако биде така се отвара и прашањето како ќе се пополни тоа место за следната сезона.
„По чекање од 30 минути, гостинската екипа не се појави на теренот, а претходно немаше најава за некое задоцнување од нивна страна. Домашната екипа присутна, исто така и службените лица односно судиската тројка и делегатот присутни на теренот. Службени лица од МВР присутни“, се вели во записникот од мечот.
