Фудбалерите на ФК Вардар и АП Брера обезбедија пласман во полуфиналето од Купот на Македонија во младинска и кадетска конкуренција.
Кај младинците, Вардар ја елиминираше Македонија ЃП по подобро изведување на пенали. По регуларните 90 минути мрежите мируваа, а во драматичната пенал серија „црвено-црните“ славеа со 6:5. Херој беше голманот Павел Грбевски кој го одбрани клучниот удар, додека претходно чуварот на мрежата на Македонија ЃП, Дарко Јовчевски, исто така се истакна со одбранет пенал.
Пласман меѓу четирите најдобри обезбеди и АП Брера, која со 2:0 го совлада Работнички. Струмичани отпорот го скршија во финишот – Матеј Сејменов погоди во 75. минута, а десет минути подоцна Иван Танчев го постави конечниот резултат.
Останатите четвртфинални дуели кај младинците се играат утре, кога Њу Старс ќе го пречека Шкупи, додека Пелистер ќе биде домаќин на Брегалница.
Во кадетска конкуренција, Вардар повторно беше сигурен и со 4:2 ја совлада Македонија ЃП. Блескаше Невзат Асани со хет-трик (15’, 36’, 49’), додека Лука Георгиоски додаде уште еден погодок. За противникот стрелци беа Дарин Михајловски и Лука Кнежевиќ.
АП Брера исто така продолжи победнички и кај кадетите, триумфирајќи со 2:0 против Работнички, со голови на Влатко Манчовски (75’) и Стефан Војчески (89’).
Кај пионерите, Вардар им се приклучи на Пелистер и Брегалница во полуфиналето, откако убедливо со 8:0 го декласираше Њу Старс на гостински терен. Најрасположен беше Николче Баталоски со четири гола, Кирил Стојановски додаде три, а еднаш стрелаше Павел Котески.
Последното четвртфинале во оваа конкуренција ќе го играат утре екипите на Работнички и АП Брера, со почеток од 11 часот.
