Во Струмица на „Благој Истатов“ ќе се одигра дербито на Истокот меѓу Беласица и Брегалница, натпревар од 13. коло на Втората лига.
Фудбалерот на штипските „сини“, Столе Попоски вели дека Брегалница е фаворит на овој меч, во Струмица одат по трите бодови, а притоа додава дека репрезентативната пауза ја искористиле за да бидат подготвени за последни три есенски натпревари.
„90% од екипата е спремна. Еден до двајца играчи не се комплетно спремни, но играчите кои ќе добијат шанса со сигурност ќе одиграат на ниво за тоа отсуство да не се почувствува. Паузата ја искористивме максимално да се подготвиме за претстојните средби, да одиграме онака како што знаеме и крајот на полусезоната да го дочекаме на едно од првите две места од табелата. Беласица е претежно млада и полетна екипа, која игра квалитетно и борбено, а тоа го докажа и во натпреварите од претходните неколку кола. Ова го гледам како дерби во кое ние сме фаворити и секако одиме на трите бодови и целиот плен“, рече Попоски пред мечот во Струмица.
Натпреварот стартува во 13 часот, се игра на стадионот „Благој Истатов“ во Струмица, а правдата ќе ја дели Боби Величков.
