Женската сениорска репрезентација на Македонија ќе одигра два пријателски натпревари со селекцијата на Косово, како дел од подготовките за настапот во Европската лига 2026, што истовремено е прв дел од циклусот квалификации за Европското првенство 2028 година.
Новиот селектор на дамите, Милош Гавриловиќ првата прозивка ја закажа на 13 мај во СЦ „Форца“ во Скопје, локација на која ќе ги одработи комплетните подготовки, додека двомечот со Косово ќе се игра на 29 и 30 мај. Едниот натпревар ќе се игра во Скопје, додека за вториот меч, кој репрезентацијата ќе го игра на гости, Косовската федерација дополнително ќе го дефинира местото.
Девојките настапот во Европската лига 2026 го започнуваат во Порто, каде се игра првиот турнир. На 6 јуни за противник ја имаат Унгарија, додека на 7 јуни играат со Португалија. Од таму продолжуваат за Шпанија, во Аликанте, каде домаќинот ги пречекува на 12 јуни, а ден подоцна се соочуваат со Азербејџан. Македонија настапот во годинешното издание го завршува на домашен терен кога во СЦ „Борис Трајковски“ во Скопје на 19 јуни ќе ги измери силите со Хрватска, додека на 21 јуни против Словенија ќе го комплетира учеството.
